ليکڪ :- قاضي منظر حيات
چونڊ :- اصغر ساگر
سائنس جي تاريخ ۾ ريڊيم ۽ تابڪاريءَ جي ڳولا هڪ وڏي اهميت رکي ٿي. ريڊيم سان ڪيترن ئي مرضن جي علاج ۾ اهم خدمتون انجام ڏنيون ويون آهن. عورت سائنسدان، جنھن انساني عالم کي هِن اڻلڀ شيءِ جي واقفيت ڏني، اُها ميڊم مَيري ڪِيوري هئي ۽ پائر سندس گهروارو هو. ٻنهي گڏجي ريڊيم حاصل ڪيو ۽ پوءِ انهيءَ جا وري خاص جُزا بہ ڳوليا.
سن 1870ع جي ڳالھ آهي تہ وارسا ۾ ڪجھ ٻارَ هڪ هنڌ کيڏي رهيا هئا. آسمان صاف هو ۽ تيز اُس چوڌاري ڦھليل هئي. ايتري ۾ هڪ ٻُڍڙي خانہ بدوش عورت اُتان لانگهائو ٿي ۽ هُن هڪ سونھري وارن واري ڇوڪريءَ جو هٿ پڪڙي چيو
”پياري نِينگري! ڇا مان تنهنجو هَٿ ڏِسي سگهان ٿي؟“
ٻارڙي بنا ڪنهن ڊپَ جي پنھنجو هَٿ ڏانھسُ وڌايو ۽ حيرت مان پوڙهي عورت کي ڏِسندي رهي.
”هلي آءٌ مرجا!“
ٻين ٻارن کيس سَڏيندي چيو:
”هِن عورت جي ڳالهين تي نہ لڳُ.“
ڪُراڙيءَ ننڍڙي مَرجا جو هٿ نہ ڇڏيو. هن جي اکين ۾ چَمڪ هئي ۽ گَد گَد پئي ٿي.
”ڪيڏو نہ سُٺو هَٿُ آهي، ڪيتريون تہ سٺيون لڪيرون آهن!“ ٻُڍڙيءَ وڌيڪ ڀُڻڪندي چيو
”تون هڪ ڏينھن ضرور مشهور ٿينديين.“
پوڙهي عورت اِهو چئي اڳتي وڌي ۽ اڄ تائين ڪنھن کي بہ ڪا خبر ڪانهي تہ هو ڪير هئي ۽ ڪيڏانھن ھلي وئي، پر سندس اڳڪَٿي اکر اکر سچي ثابت ٿي. مرجا اسڪلڊ وسڪا جيڪا اڳتي هلي ميڊم ڪيوريءَ جي نالي سان سچي جڳَ ۾ مشهور ٿي. ھن ريڊيم جي ڳولا ڪري نوبل انعام حاصل ڪري خاص سڃاڻپ حاصل ڪئي. هِن جو اهو نالو سندس مڙس پائر ڪيوريءَ جي نالي پٺيان پيو. ريڊيم سائنسي دنيا، خاص طور طِب جي ميدان ۾ وڏو انقلاب آندو.
0 comments:
Post a Comment